U nedjelju pomjeramo satove: Kako da se lakše naviknete na “novo” vrijeme

Zbog pomjeranja satova smo nekoliko dana često pospani i umorni, ali ovih par trikova će vam pomoći da vraćanje satova unazad “ne osjetite”.

U nedjelju, 27. oktobra, u tri sata iza ponoći, kazaljke na časovnicima vraćaju se jedan sat unazad. Ova promjena nam uglavnom pada lakše od prelaska na ljetne računanje vremena, jer ovog puta imamo sat vremena više sna.

 Međutim, ova promjena, iako mala, mnogima ne pada lako, pa smo često umorni i pospani nekoliko dana nakon pomjeranja sata. Razlog tome je što pomjeranje sata, bilo unaprijed ili unazad, remeti naš unutrašnji sat ili cirkadijalni ritam. Zbog toga unutrašnji sat “ispada iz ritma” sa uobičajenim dan-noć ciklusom, a koliko ćemo se brzo tome prilagoditi – zavisi. Svakako, ovih nekoliko jednostavnih savjeta će vam pomoći da se brže prilagodite promjeni i maltene ne osjetite pomjeranje sata.

Izađite napolje

Dnevna svjetlost daje signale našem unutrašnjem satu i potiskuje lučenje melatonina, hormona koji nas uspavljuje. Zato bi bilo dobro da nakon pomjeranja sata provedete što veći dio dana našolju, na dnevnom svjetlu, ali i da ne izlažete sebe jakom svjetlu kada padne mrak.

Dakle, bolje je da uveče uključite lampu nego da sjedite pod nekim jakim svjetlom jer bi ono moglo da “odloži” spavanje.

Držite se rutine

Higijena spavanja mogla bi da vam pomogne da zaspite, da mirno i čvrsto spavate cijele noći. Pod higijenom spavanja se podrazumijeva smanjenje konzumacije kofeina i alkohola, vježbanje nekoliko sati prije spavanja, kao i kreiranje umirujućih večernjih rituala koji će vas uspavati – na primjer, topla kupka.

Osim toga, važno je da liježete u krevet i ustajete svakog dana u isto vrijeme, kako bi cirkadijalni sat imao neki ritam.

Popijte čaj

Čaj od matičnjaka ili majčine dušice pomoći će vam da se opustite, smanjiće napetost i pomoći vam da zaspite. Popijte jednu šolju pola sata-sat prije odlaska na spavanje i lijepo se odmorite, kako biste spremno dočekali novi dan.

Izvor: Mondo